އަފްޣާނިސްތާނުގައި ޢަދުއްވުންތައް މަރުވަމުންދަނީ ގިނަ ޢަދަދަކަށް

15 ފެބްރުއަރީ 2010 - އަފްޣާނިސްތާނުގައި މުޖާހިދުން ހިންގި ބައެއް ޢަމަލިއްޔާތުތަކުގެ ޚަބަރުތައް ކުރުކޮށް..

• ހޮނިހިރުދުވަހުގެ ހެނދުގެ ވަގުތުގައި ކަންދަހާރުގައި ދެވުނު އިސްތިޝްހާދީ ޙަމަލާއެއްގައި އެމެރިކާނުންގެ 19 މީހުން މަރާލެވިފައިވެއެވެ. މިޙަމަލާ އަމާޒުކުރެވިފައިވަނީ އެމެރިކާގެ ޓޭންކަރެއް ކައިރިއަށް އެތައް އެމެރިކާ ސިފައިންތަކެއް އެއްވި ވަގުތަށެވެ.

• ހުކުރުދުވަހުގެ އިރުއޮއްސުންހާއިރު ޚޯސްޓު އަވަށުގައި އެމެރިކާގެ ޢަސްކަރީ ލަޝްކަރަކަށް އަމާޒުކޮއްގެން ދެވުނު އިސްތިޝްހާދީ ޙަމަލާގައި 15 އެމެރިކާނުންވަނީ މަރާލެވިފައެވެ. އަދި މިޙަމަލާގެ ސަބަބުން އެމެރިކާގެ ގިނަ ޢަދަދެއްގެ ޓޭންކަރުތައްވަނީ ފުނޑުފުނޑުވެފައެވެ.

• ޕަކްޓިކާ އަވަށުގައި ހުންނަ މުރުތައްދުންގެ ތަމްރީނުދޭ މަރުކަޒަކަށް މުޖާހިދެއް ބޯރޑަރ ސެކިޔުރިޓީ ފާރަވެރިއެއްގެ ޔުނީފޯރމުގައި ވަދެ އެތާގައި ގިނަ ޢަދަދެއްގެ މުރުތައްދުންތަކެއް ތިބި ވަގުތެއްގައި އިސްތިޝްހާދީ ޙަމަލާއެއް ދީފިއެވެ. މިޙަމަލާގެ ސަބަބުން އިސްތިޢްމާރީންނާއި މުރުތައްދުންގެ ތެރެއިން 30 މީހުންވަނީ މަރާލެވިފައެވެ.

• ހިލްމަންޑު އަވަށުގައި ހޮނިހިރުދުވަހު މުޖާހިދުންނާއި އެމެރިކާނުންނާއި ހިނގި ކުރިމަތިލުމެއްގައި އެމެރިކާނުންގެ 36 ސިފައިންވަނީ މަރާލެވިފައެވެ. އަދި އެމީހުންގެ 7 ޓޭންކަރު ވަނީ ފުނޑާލެވިފައެވެ. އަދި ހަމަ ހިލްމަންޑު އަވަށުގެ އެހެން ދިމާލެއްގައި މުޖާހިދުންނާއި އެމެރިކަނުންނާއި ހިނގި ކުރިމަތިލުމެއްގައި 11 އެމެރިކާނުންނާއި މުރުތައްދުން ވަނީ މަރާލެވިފައެވެ.

• ހިލްމަންޑު އަވަށުން ފިލަން މަސައްކަތްކުރި އެމެރިކާގެ ޓޭންކަރެއް މުޖާހިދުންގެ މަގުމަތީ ބޮމުގެ ޙަމަލާއެއްގައި އެއްކޮށް ފުނޑުފުނޑުވެ އޭގައި ތިބި 3 އެމެރިކާނުންވަނީ މަރާލެވިފައެވެ.

• މުޖާހިދުން ވަޅުލައިފައިވާ މަގުމަތީ ބޮންތަކުގެ ސަބަބުން ހިލްމަންޑު އަވަށުގައި އެންމެ 3 ގަޑިއިރުގެ ތެރޭގައި އިނގިރޭސި ސިފައިންގެ 7 ޓޭންކަރު ވަނީ ފުނޑުފުނޑުކޮށްލެވިފައެވެ.

• ހުކުރުދުވަހު މަގުމަތީ ބޮމެއް ރައްކައުތެރި ކުރަން ކުރި މަސައްކަތުގެ ތެރޭގައި އެބޮން ގޮވުމުގެ ސަބަބުން ޑެންމާރކް ސިފައިންގެ 4 މީހުންވަނީ މަރާލެވިފައެވެ.

• އެމެރިކާނުންގެ މަރުކަޒުތަކަށް މުޖާހިދުން ރޮކެޓް ޙަމަލާތައް އަމާޒުކޮށްފައިވެއެވެ. އެގޮތުން ކަންދަހާރުގައި ހުންނަ މަރުކަޒަކަށް ދިން ރޮކެޓް ޙަމަލާއެއްގައި އެތަން ބަލަހައްޓަން ފާރައަށް ތިބި 2 މީހުން ވަނީ މަރާލެވިފައެވެ.

މިހުރިހާ ޚަބަރުތަކެއްވެސް ދީފައިވަނީ އަފްޣާނިސްތާނުގެ އިސްލާމީ ޢިމާރާތުގެ ތަރުޖަމާނުން ކަމަށްވާ ޤާރީ މުޙައްމަދު ޔޫސުފު އާއި ޒަބީޙު ﷲ މުޖާހިދުގެ ފަރާތުންނެވެ.